De winnaar van de Leedjesoavendj 2023 is Eine Pot Zaat!
Zie höbbe gewonne mét häör leedje Heives! De Klamatcho’s höbbe ein sjoeën twieëdje plek behaoldj en Sjöppe Aos is es derdje geëindigd!

Aafgelaope zaoterdig waerdje tiedes de Baeremiddig Menno Beumer oêtgeroepe toet Baereprins Menno I.

Effe väörsjtèlle

Wie hètse?

Menno Beumer

Wie jóngk bös se en wannieër bös se jaorig?

5 jaor en ich bön jaorig op 15 oktoeaber.

Woea woeans se en mèt waem?

Ich woean op de Gouvernäör Hoebesjtraot, óm de hook bie de
sjoeal, same mèt papa Hedy, mama Nadieh en zöster Fenna.

Waat vins se leuk óm te doon en waat neet?

‘t Leefste gróm ich de ganse daag es eine Dino(saurus), en doon
ich alsof ich eine echte Ninja bön. Loestere en oprume zeen neet mien hobbie.

Waat duis se gaer op sjoeal en waat neet…?

Ich sjpeel gaer mèt mien vrunj rollesjpelle en bön edere daag te
vinje in de boewhook. Teikene en prikke vinj ich niks aan.

Waat duis se thoes gaer?

Sjpelkes sjpele op miene Nintendo Switch.

Vinjse vastelaovendj leuk?

Zeker wete, van bebie aaf doon ich al mèt mèt de vastelaovendj
en optoch same mèt mien oma en zöster.

Waat itse gaer en waat neet…?

Ich aet gaer sjpinazie sjtamppot mèt braodwóst en ich haoj
neet van bueënkes.

Waat is diene levelingsvastelaovesleedje?

Groete oet de fieësttent.

Höbs se zin inne vastelaovendj?

Jao zeker, verkleije, sjpringe, laat opblieve en netuurlik sjtruije
mèt konfetti is toch fantasties. En noe ich prins waer wil ich
nao ederein sjlók goeaje

Kins se ouch plat kalle?

Pap en Mam kalle plat, ich kal Nederlands, väör de sjpreuk
höb ich hieël hel mótte oefene

Waat is diene sjpreuk?

Dino, baer of indiejaan, same gaon wae 3 daag d’raaaan!

In bomvolle zaal van CC Don Bosco is op ’t prinsebal Mick van Halbeek es 57ste prins van VV de Gangmaekers oetgerope. Hieël ’t vastelaovendj vierendj volk van Hael waas aanwezig en rejageerdje entoesjaz wie Mick I oêt de koeëker sjpróng.

Effe väörsjtèlle

Leef Gangmaekers en Gangmaekerinnekes, waat leuk óm kinnes mèt uch te make! Ich bön Mick Jan Peter van Jos van Jan van Sef vanne Kuuper en Sandra van Peter van Graad van Perjaus. en ich moog michzelf nao 1,5 jaor eindelik de 57ste Prins van de V.V. de Gangmaekers numme.

Ich bön geboeare op ‘ne zónnige daag oppe 18de mei in 1993. Ónger de supervizie van de sjpesjalist van ’t ziekehoes in Remunj.

Door ’t jaor haer verkleij ich mich gaer es elektrisjaen en wirk ich in mien eige zaak oppe Sjportparklaan in oos sjoean dörpke!

In miene vrieje tied wirk ich gaer en es mich det geitj vervaele vinj ich ’t sjoean óm lekker te koeake en netuurlik daonao ouch te aete mèt ‘n good glaeske wien. Daonaeve zit ich mich hieël gaer in väör de HAJ en bön ich hieël sjporadies te vinje bie Haelfit.

Ich höb d’r óntzettendj väöl zin in, want miene väörgenger zag “ ’t Bèste mót nog kómme” dus ich hoeap det dae sjlumme geliek haaj toen der det zag!

Ich gaon mien bèst doon óm d’r dit jaor ‘ne sjoeane vastelaovendj van te make väör uch! Mer vastelaovendj is ‘n fieëst waatse same duis veere en dus kinne wae d’r allein same ‘ne échte sjoeane vastelaovendj van make! Daoróm wil ich aafsjloete mèt miene liefspreuk:

”Sjloet aan!”

De sjpanning was te snieje inne zaal. De leechte waare gedimpt. De temperatuur sjteeg. Alle Gangmaekers en Gangmaekerinnekes haaje dezelfdje vraog; Waem waere de noewe Jeugdprins en Jeugdprinses. Die vraog waerdje gelukkig sjnel beantwoordj: Quint Flekken en Jazlynn Junker met Jeugdadjudante Evi en Jeugdadjudant Luca!

Effe väörsjtèlle: Jeugdprins Quint I

Gaer wil ich mich väörsjtèlle. Ich bön Quint Flekken en bön 13 jaar. Sins twieë jaor zit ich op ‘t Mosa-RT in Kinrooi woea ich edere daag mèt plezeer haer gaon. Ich woean same mèt mien aojers, zösterke en breurke op nummer 5 in Pol. Oos 2 hoonder en 4 vèsse make oos hoeshaoje kompleet.

In miene vrieje tied gaon ich gaer ‘freerunne’. Geregeldj vinjse mich in eine boum, aan ein klumrek of op ein daak. Game en videos make doon ich ouch gaer.

Sins mien bebiejaore veer ich al vastelaovendj. Es geboearte-kedootje kreeg ich van Prins Jos I (dae toen prins waas) ein sjpèldje inne vorm van ein prinsesjteek. Ouch doon ich al jaore mèt aanne optochte en ‘t leefst ging ich es vorst verkledj mèt die daag. Vastelaovendj zit bie mich in ‘t blood. Mèt ein pap es HAPPER en aod Vorst, ein zösterke die sjoealprinses is gewaestj, ein breurke waat net es ich sjoealadjedant is gewaestj en ein mooder die bie de kepèl zitj, kin ’t ouch neet anges. Wie prinses Jazlynn mich es jeugdprins vroog, hoofdje ich den ouch gein sekonde te twiefele.

Det ich same mèt Prinses Jazlynn, adjedante Evi en Luca dees ker maag trèkke dit jaor vinj ich geweljig. Alaaf!

Effe väörsjtèlle: Jeugdprinses Jazlynn I

Leef Gangmaekers en Gangmaekerinnekes, ich bön Jazlynn Junker en 13 jaor aod. Ich zit op ‘t Connect College in Ech en woean oppe Apollosjtraot in Hael mèt pap, mam, Dennis en Tamara. Miene groeatste hobbie is danse mer sins twieë jaor voetbal ich ouch vol ueëvergave bie VV HEBES en sins dit jaor bie MO17.

Zolang es ich mich kin herinnere veer ich al vastelaovendj. Loup döks mèt inne optoch en sjtaon väöraan inne zaal te hosse. Wie ze mich kwoeame vraoge of ich prinses wól waere en of ich miene prins wól oetkeze kwoeam miene groeatste druim den ouch oet! Sónger twiefel zag ich den ouch drek JAO!!!

Ich bön den ouch super trots det ich same mèt miene prins Quint en oos adjedante Evi en Luca en netuurlik de jeugdraod de baer moog loslaote mèt de Haelder jeugdvastelaovendj!

“Es bure geboeare en noe jeugdduo gewoeare!”