Gangmaekers en Gangmaekerinnekes,

Grueëts sjtèl ich mich aan uch väör es de 60e Prins vanne Gangmaekers. Waat ein enorme ieër óm ‘t Haelder volk inne vastelaovendj te moge väörgaon! Wiedet Vorst Sebastiaan mich benaderdje, mós ich michzelf aeve inne erm kniepe – gebäördj dit écht? Ich, Prins vanne Gangmaekers? Ich hoofdje d’r neet lang ueëver nao te dinke!! Doe laefs mer eine kieër, dus wae gaon d’r vol väör! Wie ich bie Ton Abels ‘t prinsepak moch passe, veuldje ich ‘t pas écht: dit is ein groeate ieër.

Väör waem mich nog neet kintj: miene naam is Ivo Kwantes. Geboeare in ‘t riek vanne Rogsjtaekers en opgegruujdj bie De Schäöpkes in Wieërt. Väörig jaor höb ich Abraham gezeen en ich bön 23 jaor gelökkig getrouwdj mèt miene groeate sjat Marjelle. Same mèt oos kinjer Gijs en Pien woeane wae op ’t Sjleydal. Mien moder is vanne kepèl van Remunj en pap eine Kruichenzeicher oet Tilburg. In ‘t dageliks laeve vang ich boeve, want ónrecht kin ich sjlecht verdrage en minse helpe gueëftj mich enerzjie.

Netuurlik gaon ich dit avontuur neet allein aan. Ich bön den ouch grueëts óm mien drie adjedante aan uch väör te sjtèlle: Cleem Maessen, Peter Meusen en Jop Lintjens. Toeval of neet – wae woeane allemaol in dezelfdje sjtraot op ‘t Sjleydal. Minse die de Limburgse vastelaovendj goed kinne, herkinne adjedant Cleem vas. Hae is prins vanne Neelder Katers gewaestj en is muzikant in ein geweljige popbend. Hae bringtj mich de fien kneepkes van ‘t prinsevak waal bie. Peter oet Hale is ein sjportieve wielrenner, mer zètj dees daag ziene fiets aanne kantj. Hae geitj mèt ós fieëste want det kintj d’r es de bèste. Jop hoof ich neet väör te sjtèlle: eine vastelaovesveerder in hert en nere en aod-adjedant van Jeugdprins Siem I. Mèt dit druimteam gaon wae d’r same mèt uch ein fantasties sezoen van make.

Wae höbbe al väöl lol väöraaf gehadj en kieke d’r nao oet óm same mèt uch blievendje herinneringe te make. Aeve neet dinke aan alle mezerie, mer genete van waat vastelaovendj ós bringtj. Mien prinsepak hingtj klaor, de sjtevele zeen gepoetstj en ich kin neet wachte óm same mèt uch ‘t Gangmaekersriek oppe kop te zètte.

Same make wae d’r eine geweljige vastelaovendj van, väör jóngk en aod, dae toet inne wiej ómgaeving te hueëre is!

Ein sjoeane vastelaovendj gewinstj en geneet d’rvan.

Daoróm miene liefsjpreuk:

“Zing, sjpring en sjoenkel mèt ós mèt!”

Jeugdprins Mika I

Hallo, ich bön Mika van Buuren en bön geboeare op 4 mei 2012 in ‘t ziekehoes in Remunj (es emes mich vrueëgtj woearóm ich de däöre oeape laot; in ‘t ziekehoes haje ze automatiese däöre ). Mien femilie is ein echte vastelaoves femilie. Mien moder maakdje döks mèt Diana en Lonneke ein leedje väör de leedjesaovendj en zaat vreuger bie de Baerekepèl. Pap waas bie de raod van Èlf en is adjedant gewaestj bie Peter (III) ; de pap van Dani. Miene opa Harrie waas de sjlaopendje adjedant van Panhael (dus jóngk gelieërdj is …), mien broor Noa waas Baereprins en broor Luca waas sjoealprins en adjedant bie prins Quint.

Ich vinj ’t ouch leuk detter in Häör ein bord kumptj vanne Prins oet Hael (en ouch de vlag) inne hoeaf bie mien moder, want ich zit op sjoeal in Häör in de synthese brögkklas. Miene mentor woeantj ouch in Hael (dus mevrouw als u dit leest vertel ’t mij maar ). Op sjoeal bevèltj ’t mich waal en ich höb väöl vrunj: Pieter, Nora, Merle, Dani, Milan, Sem o.a.

Jeugdprinses Dani I

Hoi, ich bön Jeugdprinses Dani l. Ich bön 12 jaor jóngk en geboeare in ‘t Laurentius ziekehoes in Remunj. Same mèt mien vader, Peter, moder Kim en breurke Tren woean ich op ‘t Daalplein in Hael. Ich kóm oet ein echte vastelaoves femilie, want mien vader Peter lll en opa Gerard l zeen allebei prins gewaestj, pap en mam sjpeeldje ieërder bie de Baerekepèl enne Hofkepèl en zeen nog sjteeds bie de Rettichband. Mien ieërste óngersjeijing vanne Gangmaekers kreeg ich al wie ich pas 2 maondj aod waas, mèt miene ieërste vastelaovendj!

Ich zit inne brögkklas op St. Ursula in Häör. In miene vrieje tied vinj ich ‘t leuk óm te turne bie Turnclub Häör woea ich sins kórt ouch les gaef. Verder is ‘t leuk óm bezig te zeen mèt meziek te loestere of te make bie de Jeugdharmenie De Vriendenkrans oppe dwarsfluit. Ich höb hieël väöl zin inne vastelaovendj. Väörig jaor vónj ich ’t ouch al hieël leuk bie de Jeugdraod van Èlf , mer Jeugdprinses zeen is toch waal ekstra sjiek.

Ónger häöre liefsjpreuk:

” Gangmaeker zeen, dét is pas gaaf! “

De Gangmaekers kieke truuk op eine sjoeëne leedjesaovendj! Mer leefst 9 deilnummers!
Peter Giesen haet de orde van verdeenste ontvangen väör zien biedrage aan de geluidskwaliteit van väöl evenementen!
Iris waerdje in ‘t zunke gezatte ter ieëre van zien 11 jaor väörzittersjap van de leedjescommissie!
Isis en Nora vele twieë kieër inne prieze! Ziej wonne de aanmoedigingspries en de 2e plek!
Oeteindelijk ginge de Haelder Aod Prinse d’r met de winst van door! ‘T leedje ‘ Hie bie ós, hie in Hael, gesjreve door Peter Schoenmakers, wintj de ieërste pries!

Effe väörsjtèlle:

Ich bön Fabi Verstappen, 5 jaor en zit oppe bazissjoeal de Sleije in groep 1/2 bie juf Marilou. In miene vrieje tied sjpeel ich gaer boete. Fietse oppe sjtraot, knoeaje mèt water en netuurlik mót d’r ouch geoefendj waere mèt voetballe. Dit doon ich meistal same mèt mien broor en alle vrunj oet de sjtraot.

Eder waek traen ich bie VV HEBES JO7 same mèt al mien vrunj oet Hael. Eine sjoeaene óngerein, woea ouch waal èns get kattekwaod oetgehoealdj waerdj.

“Mèt deze baer väörop, alles oppe kop! Alaaf! “