Effe väörsjtèlle:
Ich bön Fabi Verstappen, 5 jaor en zit oppe bazissjoeal de Sleije in groep 1/2 bie juf Marilou. In miene vrieje tied sjpeel ich gaer boete. Fietse oppe sjtraot, knoeaje mèt water en netuurlik mót d’r ouch geoefendj waere mèt voetballe. Dit doon ich meistal same mèt mien broor en alle vrunj oet de sjtraot.
Eder waek traen ich bie VV HEBES JO7 same mèt al mien vrunj oet Hael. Eine sjoeaene óngerein, woea ouch waal èns get kattekwaod oetgehoealdj waerdj.
Gangmaekers en Gangmaekerinnekes, gaer sjtèl ich mich aan uch väör es 59e Prins vanne Gangmaekers. Ein groeate ieër woea ich zelf gein moment raekening mèt haaj gehaoje. Toet ‘t moment det Vorst Sebastiaan mich benaderdje väör dees rol en ‘t vastelaovesblood begós te sjtruime woea ‘t neet kin gaon…
Väör de minse die mich nog neet kinne; mien naam is David Peters, ich bön 40 jaor en dit jaor 11 jaor getrouwdj mèt mien allerleefste Yoni. Wae woeane op ‘t Sjlejdal mèt ós twieë kinjer; dochter Julie (9 jaor) en zoontje Jesse (6 jaor). In ’t dageliks laeve bön ich wèrkzaam es komersjeel mennezjer biej BASF | Nunhems, produsent van greuntezaod en inne volksmóndj ouch bekèndj es ‘t Zäödje’. Same mèt mien kollega’s wèrke we dageliks aan ‘t óntwikkele van de greunte-oplossinge vanne toekomst. Get waat mich echt aan ‘t hert geitj.
Van jóngs af aan kloptj mien hert väör de vastelaovendj. Det kan ouch bienao neet angers es aafsjtammeling van de femiliej Peters. In 1998 waas ich Jeugdprins en kórt daonao waerdje ich lid van de Baerekepel en waas ich betrókke bie de oprichting van de HAJ (Haelder Aod Jeugdprinse, Prinsesse en Adjedante). Daobie bön ich lid gewaestj van ‘t AB (Algemein Besjtuur) vanne Gangmaekers en höb ich es prizzentator jaorelangk de Pekskesaovendj aanein moge kalle.
In mien vrieje tied doon ich gaer inne hoeaf knommele, fietse en geneet ich es bourgondiër van koeake of oet aete mèt femiliej of vrunj. Mer mien allergroeatste hobbie is toch waal ‘t sjrieve van vastelaovesleedjes. Get woea ich al mien kreativiteit in kwiet kèn. Ich sjrief zoeawaal leedjes väör Haelder es anger Limburgse artieste wie Marleen Rutten of Roy Selder. Väörluipig hoeagtepuntj es sjriever waas in 2023 wie 2 van mien leedjes de finale van ‘t LVK bereikdje, woea ónger os eige Haelder jonges van Sjöppe Aos.
Ich moog mich gelökkig prieze met mien 3 Adjedante; Rhodri van Dooren (ouch mien adjedant in 1998!), Willem Delhoofen en Guus van Engelen. Degene die op vastelaovesmaondig in Kefee Oppe Linj op sjtap gaon zulle ós vast herkènne es wae dao duchtig de bieëst oet hange same mèt de anger lede van de GAAS-app 😊. Ich houp det de Gangmaekers weite woea ze aan zeen begós..!
Same mèt ós dames zeen we inne zomer in ‘t geniep begóstj mèt ‘t sjrieve van dit book en wae kinne neet wachte óm same mèt uch aan ’t echte werk te gaon beginne.
’t Is mich ein ieër óm uch mèt mien Adjedante dit jaor väör te moge gaon. Es echte Haelder jónges verheuge wae ós d’r op om d’r same mèt uch eine ónvergaetelikke vastelaovendj van te make en ‘t Gangmaekersriek te laote sjödde op zien gróndjveste. Det kan allein es gae uch bie ós aansjloet. Want, sónger uch geine Bóntje Aovendj, geine Optocht en geine sjaele zeiver… Daoróm miene liefsjpreuk:
Gaer sjtèl ich mich aan uch väör. Ich bön Bent Suntjens en op 14 desember 14 jaor gewoeare. Ich zit inne 2de klas van St’ Ursula in Heitse.
Ich woean oppe Daalzicht same mèt mien pap, mam en zöske Fem. In miene vrieje tied sjpeel ich gaer oppe computer sjpelkes en help pap en opa op oos boerebedrief.
Ich loup al jaore inne optoch mèt mèt pap en mam en de Haelse krossers. 6 Jaor geleje is miene pap Bram prins gewaestj bie de Gangmaekers en toen zoeag ich wie sjiek det waas, dus wie prinses Mila mich vroeag of ich häöre jeugdprins woeaj waere vónj ich det ein hieël ieër en höb drek jao gezagdj.
Gaer wil ich mich aan uch väörsjtèlle. Ich bön Mila den Ouden, 13 jaor aod en ich zit inne brökklas van St. Ursula in Heitse.
Ich woean same mèt pap, mam en breurke Bas in Panhael.
In miene vrieje tied vinj ich ’t leuk óm mèt vrunj aaf te sjpraeke, te teikene en meziek te loestere. Ouch bön ich regelmaotig te vinje oppe tennisbaan in Hael.
Väörig jaor höb ich mèt väöl plezeer bie de Jeugdraod van 11 gezaete en väör mich waas Jeugdprinses waere eine echte droum dae noe oetkumptj.
Neet te geluive!
Zaoterdig 4 jannewarie is de väörverkaup vanne Bontje Aovendj kaertjes ! De bontje aovendje vinje dit sezoen plaats op:
Vriedig 17 jannewarie & zaoterdig 18 jannewarie
Es lid van VV de Gangmaekers, (herkenbaar aan ’t speldje van het jaormotto), bösse op zaoterdig 4 jannewarie om 14.00 welkom in CCDB om dien kaertjes te kaupe.
Gangmaekers die gein lid zeen van de vastelaovesvereiniging moge vanaaf 14.15 aansjloete om ein kaertje te kaupe
Oppe Leedjesoavendj aafgelaupe zaoterdig is Sjäöpe Aos es winnaar oet de bus gekömme! De HAP eindigde es twieëde. Beide artiesten moge häör leedjes opnumme biej Marlstone Music.
