Sjoeënste vastelaovesfoto 2013
10 maart 2013
Leef luuj,
Fijn det gae noe dees site bezeuktj om de foto’s te bekieke.
Foto’s die wae dit jaor spesjaal gemaaktj höbbe väör de Haelder luuj of väör al die luuj die, om waat väör raeje den ouch, de Haelder vastelaovendj höbbe motte misse
Om det sjieke vastelaovesgeveul van die daag met Prins Koen I, Jeugdprins Sam I en Baereprins Noa I en natuurlik häör ganse gevolg nog effe te kènne vashaoje höbbe wae dit jaor 33 albums met in totaal mieër den 5000 foto’s aan de site toegevoegdj.
Höbtj gae ze allemaol al bekeke?
Dit jaor gaon wae ouch weer ein ‘foto van ut jaor 2013’ keze die vanaaf de elfdje van de elfdje 2013 tentoeëngesteldj wueërdj in de fwaajee van CC Don Bosco in Hael.
Wae gaon ut dit jaor get anges doon es det gae van os gewindj zeentj: edere fotograaf haet 2 foto’s oetgezoch en de kommendje waek zal ein fotozjenieke zjurie zich ueëver dees 8 foto’s gaon buige.
De zjurie is samegestèldj oet 11 luuj die allemaol op hun eige wies de vastelaovendj belaeve en bekieke.
Zunjig 17 mieërt höbbe wae alle reaksies van de zjuurie-leje binne en komme wae hie bie uch truuk met de oetsjlaaag.
Zeentj gae net zoeë benuudj es wae?
Den zeen wae uch hoeëpelik zunjig 17 mieërt hie truuk!
De Fotokemissie
Guido, Peter, Jos en Sandra